ايران تورك: تاريخ تركان ايران ، آذربايجان و جهان
تاريخ، فرهنگ و زبان مردم آذربايجان و تركان جهان
تاريخ : شنبه 1392.3.11 | يازار : ماكولو هاراي| تعداد بازدیداین مطلب: 0
+0 رأي

آنا ديلي‌نين اينكشافي

حيات هر ملت زنده اي با زنده بودن زبان آن ملت مفهوم پيدا ميكند. تداوم حيات بشري، و غناي تمدن انساني با زنده ماندن زبان ملتها در رابطه مستقيم است. هر گونه تلاش براي زنده نگه داشتن هر زباني كمك به پيشبرد كاروان تاريخ تمدن است. در اين زمينه زبان شناسان تاريخي به اهميت حفظ و نگهداري زبانهاي زنده امروزي تاكيد ميكنند. زبانهايي كه شكل نوشتاري آنها به هر دليلي امكان عملي نيافته، بيش از ديگر زبانها در شرف نابودي است. بنابراين توجه به زبان مكتوب ملت آزربايجان و تلاش در راه گسترش شكل نوشتاري و ادبي آن ميتواند به كاروان ترقي تمدن بشري عمومن و نيز غناي فرهنگي ايران ياري كند و سيماي واقعي موجوديت مردم ترك زبان ايران را در آئينه تاريخ حك نمايد. از اين طريق روند خلاقيتها گشوده ميشود و چهره مشخص ملتي در قالب متون ماندگارعيان مي‌گردد و بر سالها بي حرمتي مطلق عنان زده ميشود.



 حميد داديزاده


زبان مادري موسيفي ابدي و بازگو كننده داستان زندگي هر ملتي است - حميد محمد زاده


آنا ديلي اينسانين تمام كوتله‌وي و عموم بشري جنبه لريلن چوخ ياخين ايلگيليدير. هر اينسان هر بير زاددان اول اوز آنا ديليلن علاقه باغلار و اونا ماراقلانار. آنا ديلين خصيصه لري و اوندا اولان پوتانسيل و قودرت هر اينسانين سوسيال اينكشافيندان آسيليدير. اونا گوره مكتبلر، مدرسه لر، كالجلر، انستيتولر و يونيورسيته لر هاميسي اينسانين ديلين، و ديلينده اولان كاراكترلارين ديرچلتمه ليديلر. آيري سوزله دئسم آنا ديلي، اينسانين اينساني ايستك لرين، عاطفه و احساسلارين بئجردمه ليدير. بونا گوره آنا ديلي آتمسفري يارادماق بيرينجي اونملي ايشدير. فيلولوقلار و روانشناسلار آنا سوديلن گلن اينسان قوه‌لرين، خصلتلرين و ديگر باشاريلارين گول آچيب پارلاماسيني، آنا ديلين محيطنده گورورلر. بونا گوره بيرلشميش ميللتلرده اوز بين الخلق چارترلاريندا ۱۹۴۶ دا، آنا ديلين تدريسين مكتبلرده بوتون اوشاخلارا تنفيذ ائديب و بو اهميتلي معنايه اشاره ائديبدي.

بو ساحه ده دونيا بويو تانينميش برزيللي پداگوگ، پائولو فرئير(۱) چوخ دولغون و قاليجي ايشلر گوروب و جانلي تجربه لرله اوز فيكيرلرين و تئوريلرين ثبوته چاتديربدير. آنا ديلي اينسانين “جان” ديلي دئمك ، اوشاقا بير قودرت حساب اولونور. پائولو فرئير اينسانلاري اوز اينسانلايقلارينا و اينسان حاقلارينا چاتديرماق ايچون، اونلارين آنا ديلينين اينكشافينه اشاره ائدير. بير اينساني بير يئرده نظرده آلين كي اوز آنا ديلي اولا اولا، اوز آنا يوردوندا، يعني دوغولان يئرده اوز ديلينه تعليمات گورميه. و امما بير رسمي ديل تعليمات ديلي اولا، بير يابانجي ديلده خاريجي ديل . سيز بويله اينسانين يئرينه اولسوز نئجه دوشونرسوز؟ اوز وجدانيزا جاوابينيز نه اولارمي؟ ايكي ديله درس ساحه لرينده معروض اولااولا اوز آنا ديلينيزدن محروم قالاسانيز؟

اونا گوره، شبهه سيز ، بيزيم مكتبلرده ، آنا ديلي تربيه سي بير آتمسفر گره‌ك مكتبلرده يارادا، كي درسه گئدن اوشاخلار، اور آنا تركي ديللرين بير زنگين خزينه كيمي گوروب، او ديليله بير ئولمز باغليليق و علاقه يارادالا. چون كي آنا ديلي اوشاخلارين بيرينجي تملوكي حساب اولونور، آنا سوديلن گلن قوه و باشاري. بونا گوره ده “ّگوردون ولزّ(۲)” واونون همكارلاري تورنتو اونيورسيته سينين پداگوژي انستيتوسوندا درين آراشديرما آپاريب و بويله يازيرلار:

اوشاخلار، درس اوخويانلار مكتبلرده آنا ديلي اوخوماقينان اوزلرين بير فيكير صاحبي گوروب و اوز اوزلرينه گووه نيب و درس كلاسلاريندا يارادماق و دايالوگلا اوز آنا ديللرين يوخاري سويه لره قالديرا بيلرله”"

آنا ديلينه احترام ائديب و اعتبار وئرمكله ، اوشاخلاريميز مكتبلره و تعليمات ساحه لرينده اوز وارليغلارين كيتابلاردا وراقلايب، اوخويوب، و چاغداش حياتين ملزمه لريلن تانيش اولوب ، اوز آنا ديللرين داها اسارتده گورمزله.

آزربايجان كلمه سي قولاغا ديركن گره‌ك بو ميللتين ديلي نظره آلينسين. ديلسيز بير ميللت اولارمي؟ يادداشتسيز بير توپلوم معاصر دونيادا ياشارمي؟ آزربايجان تاريخي ده نظره گلنده هر بير مسئله دن اول بو بويوك ميللتين ديلي گره‌ك نظرده آلينا. بير آيدين، امما غصه‌لي، ملاللي فاكتا اشاره ائديم بوردا: بو گون يونيسف، بيرلشميش ميللتلرين ساوادليقا يئتيشن اورگاني، دونيادا ساوادسيزلاري ساوادلي ائتمكه چاليشير. چوخ گوزل بير ايشدير. ايندي آزربايجاندا بيزيم قادينلاريميزين بير حصه سي بو انسانليقين بيرينجي نعمتيندن محرومديلار. نيه گره‌ك معاصر تكنولوقيا دورونده يوزمينلر ديرلي آزربايجانلي ساوادسيزقالا. اوزااقا گئتمه ين. آنا ديل تعليماتين محروم ائدن پهلوي سلاله لري، بو ايشده تاريخه گره‌ك جاواب وئرسينلر. آزربايجانين شهرلرينده آنا ديلي تعليماتي ياساقلانماسينين اثرلريندن بيري ده آزربايجان قادينلارينين ساوادسيز قالماسي دير. يا اوشاخلاري مكتبلر عوضينه، آنا ديلي تعليمات يئرينه، كندلرده اوبالاردا كليم، ججيم و يا فرش دزگاهلارينين باشيندا حبس ائديلمه سيدير.

آنا ديلي يالنيز بير سيرا كدلار و يا خود حارفلار دگيل. آنا ديلي يالنيز بير بسيط اشاره لر و رمزلردن عبارت دگيل. آنا ديلي بير ميللتين اعتباري آدلانير. آنا ديلي يالنيز شفاهي، هرج و مرجله دانيشيق دگيل. آنا ديلي بير نعمت كيمي آنا سوديله نسيلدن نسيله وئريلر. بو قوه، نوام چامسكي دئميشكن بير “موتور” كيمي اوشاخلارين بئينلرينده ميراث كيمي وار. بو ميراثي و يا بالقوه وارليغي، تانينميش متدلارلا مكتبلرده تدريس ائديب و گراماتيكين اوشاخلاريميزا اورگدماق لازيمدي. آنا ديلين مقامين و آنا ديلين شرفين اوشاخلاريميزا دونه_ دونه تاپشيرماليوق. آنا ديلي بير ثروتدي، هر ميللتين بطنينده؛ بو ثروت هر ميللتين ذاتي وارليغين عكس ائدير. بو ثروت يازيلي و متدولوژيك شكليده بديعي ادبي و هنري ژانرلار فورمتينده ياراناندا، بير ميللتين تاريخده كيم اولماسيني ترنم ائدير.

اهل تمكينم مني بنزتمه اي گول بولبوله

درده يوخ تابي اونون هر لحظه مين فريادي وار

محمد فضولي(۳) بغدادي نين شعرينين بو مصرع سي منيم سوزومه بير نشانه دير. يعني بيزيم آزربايجانين ترك ديلي ادبي فورمالاشماسيندا، فضوليلار يارادا بيلر.بو شعرده اينسانين تاريخ بويو وارليغي و اقتداري ياتيب. بويله محتوالي ادب پارچالاري بيزيم اوشاخلاريميزا ايضاح ائديلمه ليدي. بو كولتور و يازيلي ادبيات تكجه آزربايجان مدنييتي يوخ، دونيا تمدونوني ده زنگينلشديرير. ائله اونا گوره‌ده، ويل دورانت اوز تانينميش “دونيا تمدوني تاريخي” اثرلرينده اشاره ائدير كي” دونيا تمدوني بوتون دونيا خالقلارين مشترك محصولودور”. يعني بيزيم ادبي_ بديعي ياراديجيليقلاريميز دا، بو محصولون بير حصه سين تشكيل وئرير. نتيجه آلماق اولا بيلر كي، آنا ديلي اوز باشينا اوتورمك اولماز. بو ديلي بير آت كيمي تومارلايب، يم وئريب، قورويوب، و صاحب چيخماليوق. آنا ديلي بيزيم وارليغيميزين ان اونملي پارچاسيدير. بو نعمت، بو وارليغ بير ديري، جانلي اورگانيزمي واردير. آتا بابالاريميز دئميشكن بد نعمت” الله وئرگيسيدير”. داها ساده‌جه دئسم، آزربايجان تورك ديلي بير ديري موجود كيمي ياشيور. بيزيم ميللتين بورجودي بو آتا بابالارين، بويوك آنالارين ميراثين معاصيرلشديريب، چاغداش حياتين ايستكلريله، بو ديلين قول بوتاغين مدرن لشديريب، و يئني ژانرلاري ميللته ارائه ائتسين. بو گون آزربايجان موسيقيسينين اينكشافي گوزه دگير. چون كي معاصر فورملاري اوز تملوكونه آلير و ثروتين آرتيرير. امما يازيلي ادبياتيميز شاه دوروندن تحريم اولدوغونا گوره، شفاهي حالتده قاليب و دئمك بير دموده و ئولي استاتوستا ثابيت قاليبدير.

آنا ديلين مقامي انساني توپلوملاردا او قدر اونمليدير كي هر ميللتين روحونون ساغلامليغي ، اقتصادي ساحه لرده اونون ايره لي يورومه سي، بالالارينين استعدادلارينين چيچكلنمه سي ده او ميللتين آنا ديلينين استاتوسونه باغليدير. بير باشقا ترم لرله دئمك اولور كي، آنا ديلي جان ديليدير. ائله دليلسيز دگيلدير كي شاعيرلرين آنا ديلينده شعرلري و ادبي بديعي اثرلرين، باشقا ديللره چئويرمه سي چوخ زور و چتين اولور. آنا ديلده آكسانلار، هجالار، سسلر، فونيملر مورفيملر بير توتاليته و مجموعه يارادير، كي هئچ بير زامان ممكين دگيل باشقا ديله عيني فرم و محتواسيندا ترجمه اولا بيله. بوردا بير نوكتيه ده اشاره ائديم، اودا آنا دبلينين كاراكتري و هر كيمسه يه بير فرد كيمي يا هر بير جمعيته “هويت” يارادماسيدير. اونا گوره ده او اوشاخلاركي غريب ئولكه لرده دوغولورلا و يا عمورلرين اورداگئچيرديللر، اونلاردا اوز ديللرين ده دانيشماسالاردا، اونلارين تانينميش هويتي اوز آنا ديللريله تانينير. هويت يا كيمليك هر ميللتين دونيا راداريندا شخصييتين گوسترير و آغاج كيمي يئر اوزونده او ميللتين ريشه لرين (كيمليكين) آيدينلادير. بو سورو آرايا گلير كي دسپوتيك نيظاملاردا كي تاپدالانميش ميللتلرين وارليغي دانيلير، و بير ديل رسمي و حاكيم ديل تحميلي شكيلده فورمال يا رسمي آدلانير، نتيجه‌سي اوزون سوره ده نه اولور؟

بير دانيلماز حقيقت بودركي هر بير زاد دانيليرسادا آنا ديلي دانيلماز. بو بير علمي فنومن‌دير كي آنا ديلي هر اينسانين قان كيمي دامارلاريندا دولانير و او اينسانا هويت باغيشلير. اينسان ديلي اينسانلار آراسيندا يازيليب پوزولماقلا، زنگينله شير. اونا گوره پداگوگلار تاكيد ائديرلر كي، درس كلاس لاريندا آنا ديلي گره‌ك درسه گئدنلرين آراسيندا بير ايتي سلاح كيمي كسرلي اولا. دانيشيلا، گون به گون باشقا ديللرله آليش وئريشده اولا. آنا ديلي بير دگرلي ميراث كيمي بير ميللتين حضورون دونيا عرصه لرينده گوسترير و ثبوت ائدير. آنا ديلي يازيلي فورماسيندا بير تكست اولوب و سونرا بو تكست يا متن چشيتلي ادبي ژانرلاردا اوزون يازيچيلارين ياراديجيليقلاريندا گوسترير.

كيمدير بو گون آزربايجاندا اوستاد يحيي شيدا، استاد بارز، دكتور فرزانه، دوكتور هيئت و يا گنجعلي صباحيني دانا بيله. بونلار اوز آنا ديللرينه چتين گونلرده يازيب ياراتماقلا بير ميللتين ساتين آليب، وارليغين تضمين ائديب و بو ميللتين ياراشيقين عكس ائديبلر.

آنا ديلي اوشاخ دونيايه گوز آچاندا اوندان برابر دوغولور و آنا سوديله و آنا محبتيله اوشاقين وجودوندا دولانير. بو معنوي ثروت اوشاقا اور‌ك قوه‌سي ، رواني ثبات، سوسيال هويت، و قودرتلي اينساني و مدني سلاح وئرير. بوتون مدرن فيلولوقلار و يازيچيلار آنا ديلين بو قودرتينه اشاره ائديب و ديلي، دئدييم كيمي، “انديشه ابزاري و تفكر قاليبي ” آدلانديريلار. ايندي سيز بير جامعه يا بير عائله و يا بير مكتب نظره آلين كي اوردا آراشديرانلار، محققلر و فيكير صاحيبلري اوز نورمال و ماليك اولدوغو ديللريندن محروم ائديله . محروميت بير طرفه، بير طرفدنده يوزلرجه اهانت، حورمت سيزليق و راسيستسي و شووينيستي اوبرازلار و تشبثلر اونلارا گوستريله. بو وضعييته معروض اولان اينسانلار، سوسيال هيرارشينين هر يئرينده اولورسا اولسون، ، هر مقامدا دا، ياواش ياواش، اوز ديلليندن، يازيلي وارليغيندان آيريلاركن، اوز اوزوزندن، اوز هوييتيندن ده “فاصله” آچار و اوزاقلاشار. بو مرحله بير تراژيك مرحله دير. “من كيمم” سوروسو او زامان نورمال جاواب تاپار كي، اينسان نورمال حالدا اوز آنا ديليله كونوشسون، و آنا ديلين پناهيندا دينجله بيلسين. بوردا ديل يالنيز آلفابت يا حرف و كد حساب اولمور؛ بلكه بير “معنا و هوبت و وارليق” ظرفي حساب اولونور. بوردا آنا ديلي بير آيدين آيكان و يا مارك و اشارت كيمي بير اينساني مشخص اينسان كيمي تانيتديرير. بوردا هر اينسان، بير “اوتنتيك” موجود و بير معين انديويدوال كيمي يئر تاپير. بونا گوره او اينسانلار كي مولتي كالچر و يا نئچه ديللي توپراقلاردا ياشيورله، اونلارين كيمليكلري، جغرافيايي رسمي و تحميل اولونموش مستملكه چيليق هوويتينده يوخ، بلكه اونلارين آنا ديللريله تانيلير. . اونا گوره آزربايجانين ضيياليلاري بو اونملي فاكتدا گرك ديققت ائديب، ديلين مقامين يالنيز اونون مكتبلرده تدريس اولومماسينا كفايت ائتمه ييب، ديلين مقامين هر توپلومون ايره ليه گئتمه سينده ده گر‌ه‌ك گورسونلر. بو كونكو آمارلار و رقملر گورسه دير كي، آزربايجاندا گون به گون ميللتيميزين ساوادسيزلاري چوخالير، چوخالماسادا آزالمير. آزربايجان شهرلري بوشالير، و اقتصادي _ كولتورل عرصه لرينده ديگر استانلاردان گئريه قالير. بو بير تراژدي آدلانا بيلر. بير نمونه تاريخدن فاكتا اشاره ائديم. ۶۰ ايل بوندان ئونجه ، يالنيز بير ايل آزربايجاندا ميللي حوكومت دورونده، ساوادليلارين سايي چوخاليب،و جامعه بير تعادله چاتير. ويليام داگلاسين يازديغينا گوره آزربايجاندا “جرم، جنايت، اوغورلوق آزالير”. ميللي حوكومت دورون چشيتلي ساحه لرده آراشديرماليوق. ديلين آزاد اولماسي مبللتين پسيكولوژيك زنجيرلرين بوشالديب ، بير قودرت اونلاردا يارادير. اينسانلار اوز ديليله تانيش اولور، اونلا دونياني “معنا” ائدير، حياتي”تبيين” ائدير، و ياشاير. دئمك اولور كي ديل اوز مقامين تاپاندان سونرا، ميللت آلياناسيوندان اوزون قورتارير، اور سوفره سين اوزي آچير؛ اوز چراغين اوزي يانديرير ؛ ديلينين ارزشلرينه وقوف تاپير. بو حالتده ميللت بير هارمونيه چاتير؛ آسلانيقلي استاتوستان قورتولور، و رواني باخيمينداندا اوزن بير شعورلي اينسان، و بير مشخص ميللت كيمي تانيور.

بو اصلي دوشونمك چوخ استعداده احتياجي يوخدور كي بير ميللت اوز ديلينين كيفييتيني آنلايب و اوني يوخاري سويه ده اورگه شندن سونرا، بير تعادوله چاتير. بو هارموني اوزون جامعه نين چشيتلي ساحه لرينده كوسترير. آزربايجاندا ميللي دولت زاماني بو تعادل و هارموني سبب اولدي ايشلر گورولسون، مكتبلر تيكيلسين. . دوغروداندا ديلسيز بير ميللت و آلياناسيونا دچار اولان بير خالق يالنيز بحرانلارا معروض قالا بيلير. باشقا سوزله دئسم، ديل هارمونيسي اولماسا ميللت بير تعارض آتمسفرينده ياشار. آنا ديلي غايب اولان يئرده اينسانين عاطفه لري ارضا اولمايب، محيطده بير جور تعارضلر گورسه نر. تعارض اولان يئرده ميللت اوز آنا ديلين دانيشماقدان خجالت چكر. . بير تورپاق، يا بير ميللت كي ايراندا ساواد، علم، مدنييت، هنر، و توليدين مركزي و بيرينجيسيدي، بيرينجي مطبوعات و ياين ائوي اوردا بر پا اولدو و تهرانينان رقابت ايليردي، بو گون بير تحقيقاتا گوره ايرانين ۲۴ ايالتينين ايچينده، ساواد باخيميندان آزربايجان ايگيرمينجي رديفده و اورميه و غربي آزربايجان ۲۲ نجي رديف ده قرار تاپير. (۴)

سوزوم آخرينده چوخ يئرلي گورورم آيت الله ميرزا عبدالله مجتهدي نين خاطراتيندان بير پارچايا اشاره ائده‌م. بوردا من چوخ ديل پداگوژيسي باخيميندان مسئله يه اوغراشيرام. آقاي مجتهدي ۱۳۲۵ نجي ايلده ميللي مجليسين قورولماسينا اشاره ائدركن اوردا تركي ديلينده دانيشيب ، شعر اوخوماقلاري يازير و چوخ دقيق بويله قيد ائدير: “….تركي ديلي يازيب اوخوماق ادامه تاپسا، او زامان يازيلي ادبياتين تطبيقي ده آسان اولاجاق. آنا ديلين تدريسي ، بيرينجي مرحله ده، ابتدايي درسه گئدن اوشاخلارين ايشين راحاتليه جاق. جونكي يازماق و اوخوماق ديلي آنا ديلينن بير اولماقينان مدرسه اوشاخلارينين يوكي يونگولله شيب و ايكي ايش بير اولاجاقدير”.۵

آنا ديلين اوگره نيلمه سي اگر يوخاري سويه ده اولسا، بير معين اينجه ليكلر و طراوت انسانا باغيشلار. حميد محمد زاده بو مسئله يه اشاره ائدركه دئير۶:

آنا ديلي ابدي موسيفي، عمرون غنچه لي گونلرينين سولماز بير داستاني در. آنا ديلينده اولان اينجه ليك و هم_آهنگ ليك انسانين سونرادان تحميل و زور ايله ئوگرنديگي ديلده تاپيلا بيلمز. كونوللي اولاراق ئوگره شيلمه ين بير ديلين خاطرلاديغي حادثه لر نه اينكه ماراقلي دگل حتي ديمك اولار كه نفرتلي در”. سونرا آنا ديلين هر ميليتين هويتيله باغليليغينا اشاره ائديب و يازير

آنا ديلي، آنانين دوشوندن سود امركن آنانين دوداقلاريندان آلينان سوزلر ايله محكمله نيب جان ايله بدندن چيخان ديل در. بو بيرنجي نوبه ده هر ميللتين ئوز گله جك نسلي ايچون تاپشرديغي ميراث و اونون ، او ميللتين عضوي ساييلماسي ايچون اساس مدركي دير”. بو يازي ۵۰ ايل بوندان ئونجه بو دقتلي آنا ديلينين مقامينا اشاره ائتميشدي.

نتيجه آلماق اولاركي هر بير نورمال انسان يا بير نورمال ميللت بو گونكو دونياده اوز وارليغين گلن نسيللره انكيشاف ائديب و دونيا مدنييتين زنگينلشديرماق ايچون، اوز آنا ديلينده تعليمات گورمه ليدير. آنا ديلين يوكسلمه سي يولدا چاليشماليدير. بو بير فطري و غريزي اصليدير. ميللتين روحي ساغلامليغي دا او ميللتين آنا ديلينين مقدس مقامينا چاتماقدادير. آزربايجانين داهي و برجسته و تانينميش عالملري ده بو نكته يه اشاره ائديب، ميللتين رئال حياتيندان تاريخده مثاللار وئريبله. آنا ديلين انكيشافي بير ميللتين ادبي علمي كنجينه لرينين انكشافيدير. بير ميللتين آينا كيمي حيات نبضينين ووريلماسيدير. آما ديلين انكشافي بير بويوك ميللتين گيزلي حافظه ده اولان تاريخينين آيدينلاشماسي و او ميللتين فطري استعدادلارينين چيچكلنمه سيدير. بو يولدا هر نه قدر سرعتله چاليشيلسا، داها چوخ ثمرلر الده ائديله جاقدير. آنا ديلي بير فيضان ائدن قويو كيمي‌دير. بو قويو درينشديق سا داها دورولوب، زلال لاشار. بو بير علمي سوژه دير و بونو چوخ اونملي توتماليوق.

منابع

۱_پائلو فرئير، “آزادليق پداگوژيسي “_ ?A Pedagogy for Liberation, with ira Shore , ISBN 0 89789 105 8

۱۹۸۷،چاپ آمريكا

۲_گوردون ولز _ جك نيكولز، “ديل و اورينماق “?Language and Learning, an Interactional? Perspective

چاپ انگلستان ، ۱۹۹۰، شماره استاندارد كتاب ۱۸۵۰۰۰و

۰۲۸۳_ويليام داگلاس، سرزمينهاي نا آشنا و مردم مهربان، ترجمه حميد داديزاده، تابستان

۲۰۰۳۴_ عليرضا صرافي ، ضرورت آموزش به زبان مادري، تبريز، اينترنتدن آلنميشدي.

۵_آيت الله ميرزا عبدالله مجتهدي، بحران آزربايجان، (سالهاي ۱۳۲۴_۱۳۲۵ش)، به كوشش رسول جعفريان،۱۹۷۵. چاپ تهران جاپ و نشر نظر

۶_محمد زاده، حميد، آنا ديلي ابدي موسيقي، عمرين غنچه لي كونلرينين سولماز داستاني در، ۲۰۰۱،ملي حكوومت و راي لر كيتابيدان . ۲۰۰۱ كانادا ونكوور

*_حميد محمد زاده ، آنا ديلي،ابدي موسيقي ،۲۰۰۱_ونكوور ملي حكومت و راي لر(۵)

يازان: حميد داديزاده

 



 100 درجه کلوب دات کام چاپ این صفحه بؤلوم لر: درباره زبان تركي
آرشيو

ایران تورک : فرهنگ و تاریخ تورکان جهان

ایران تورک : فرهنگ و تاریخ تورکان جهان

سون يازي لار
يولداش لار
سايغاج
ايندي بلاق دا : نفر
بوگونون گؤروشو : نفر
دونه نين گؤروشو : نفر
بوتون گؤروش لر : نفر
بو آيين گؤروشو : نفر
باخيش لار :
يازي لار :
يئنيله مه چاغي :